Kerala State Minority Commission is bound to consider these issues...

*കേരളത്തിലെ ന്യൂനപക്ഷ കമ്മീഷനോട് പറയാനുള്ളത്....*

കേരളത്തിൽ ന്യൂനപക്ഷ പദ്ധതികളുടെ നടത്തിപ്പിൽ ക്രൈസ്തവ ന്യൂനപക്ഷ വിഭാഗങ്ങൾക്ക് ജനസംഖ്യാനുപാതികമായ പരിഗണനയും ആനുകൂല്യങ്ങളിൽ പങ്കാളിത്തവും ലഭിക്കുന്നില്ല എന്ന്  വ്യാപകമായ പരാതികളുണ്ട്. സമീപകാലത്ത് കേരള സംസ്ഥാന ന്യൂനപക്ഷ കമ്മീഷൻ ജില്ലകൾ തോറും നടത്തിവരുന്ന സിറ്റിങ്ങിൽ ഇത്തരം വിഷയങ്ങൾ ഉന്നയിച്ച് കമ്മീഷൻ സർക്കാരിന് ഇക്കാര്യങ്ങൾ സൂചിപ്പിച്ച് ശുപാർശകൾ നൽകിയാൽ  അത് പിന്നീടുള്ള തുടർനടപടികൾക്ക് ഗുണകരമാകുമെന്നാണ് പൊതുവേ നിഗമനം ഉള്ളത്. പല രൂപതകളും ക്രൈസ്തവ സംഘടനകളും ഇതിനോടകം ജില്ലാതല ഹിയറിങ്ങിൽ ഹാജരായി അഭിപ്രായങ്ങൾ അറിയിച്ചിട്ടുണ്ട്. കമ്മീഷൻ അംഗങ്ങളുടെ നിയമനത്തിൽ ഉൾപ്പെടെ ക്രൈസ്തവ വിഭാഗങ്ങളോട് അവഗണന ഉണ്ട് എന്ന്
പരാതികൾ ഉണ്ടെങ്കിലും ഈ കാര്യത്തിൽ ശുഭാപ്തിവിശ്വാസത്തോടെ കേരളത്തിലെ ക്രൈസ്തവ ന്യൂനപക്ഷ വിഭാഗങ്ങൾക്ക് സമർപ്പിക്കാവുന്ന നിർദേശങ്ങളുടെ കരട് രൂപം - 

1. രജീന്ദ്ര സച്ചാർ കമ്മീഷൻ, പാലൊളി കമ്മീഷൻ മാതൃകയിൽ കേരളത്തിലെ ക്രൈസ്തവരുടെ പൊതുവായും ലത്തീൻ കത്തോലിക്കരിലെ ഉപജാതികൾ ഉൾപ്പെടെ ദളിത് ക്രൈസ്തവരുടെയും പിന്നോക്കാവസ്ഥ പ്രത്യേകമായും പഠിക്കുന്നതിനും പരിഹാര നിർദേശങ്ങൾ സമർപ്പിക്കുന്നതിനും പ്രത്യേക അന്വേഷണ കമ്മീഷനെ നിയോഗിക്കുക. 

2. ന്യൂനപക്ഷ ക്ഷേമ പദ്ധതികൾ നടപ്പിലാക്കുന്നതിൻറെ ഭാഗമായി ക്രൈസ്തവ വിഭാഗങ്ങൾക്കും ജനസംഖ്യാനുപാതികമായി ക്ഷേമപദ്ധതികളുടെ വിഹിതം ലഭിക്കുന്നുണ്ട് എന്ന് ഉറപ്പുവരുത്താൻ സംവിധാനങ്ങൾ ഉണ്ടാക്കുക.

3. ജില്ലാ അടിസ്ഥാനത്തിൽ ന്യൂനപക്ഷ ക്ഷേമപദ്ധതികളുടെ അറിയിപ്പും ഏകോപനവും നടത്തുന്നതിന് പ്രത്യേക നോഡൽ ഓഫീസ്/ സമാന  സംവിധാനം രൂപപ്പെടുത്തുക. 

4. ന്യൂനപക്ഷ വിഭാഗങ്ങൾക്കുള്ള പരിശീലന കേന്ദ്രങ്ങളുടെ പ്രിൻസിപ്പൽ നിയമനം ഉൾപ്പെടെ മുഴുവൻ നിയമങ്ങളുടെയും ഗുണഭോക്താക്കളുടെയും കാര്യത്തിൽ ക്രൈസ്തവർക്ക് ജനസംഖ്യാനുപാതികമായ പ്രാതിനിധ്യം ഉറപ്പുവരുത്തുക.

5. പ്രധാനമന്ത്രി ജൻ വികാസ് (Multi sectoral development programme) ജില്ലാ സമിതി രൂപീകരണത്തിൽ ന്യൂനപക്ഷ വിഭാഗങ്ങളിൽ നിന്ന് മൂന്ന് അംഗങ്ങളെ ജില്ലാതലത്തിൽ നിയമിക്കുമ്പോൾ ക്രൈസ്തവ വിഭാഗത്തിന്, ലത്തീൻ കത്തോലിക്കർ, ദളിത് ക്രൈസ്തവർ ഉൾപ്പെടെയുള്ളവർക്ക്മതിയായ പ്രാതിനിധ്യം നൽകുക. പത്തനംതിട്ട ജില്ലയിൽ ഒഴികെ ബാക്കി 13 ജില്ലകളിലായി 39 അംഗങ്ങൾ ഇത്തരത്തിൽ നിയമിക്കപ്പെട്ടതിൽ  7 ക്രൈസ്തവർ മാത്രമാണുള്ളത്.

6. കഴിഞ്ഞ എൽഡിഎഫ് സർക്കാരിൻറെ കാലത്ത് പൊതുഭരണ വകുപ്പിലെ ഉത്തരവ് നമ്പർ 5001/12 തീയതി 16.6.2012 പ്രകാരം 1000 ന്യൂനപക്ഷ പ്രമോട്ടർമാരെ നിയമിച്ചതിൽ 143 പേർ മാത്രമാണ് ക്രൈസ്തവരായി ഉള്ളത്. ഇക്കാര്യത്തിൽ ഉൾപ്പെടെ ജനസംഖ്യാനുപാതികമായ പങ്കാളിത്തം ഉറപ്പു വരുത്താൻ നടപടികൾ കൈക്കൊള്ളുക. 

*അവലംബം - 2011 സെൻസസ്.*

ആകെ ജനസംഖ്യ 33406061 

ഹിന്ദു ജനസംഖ്യ  18282492 54.73% 

മുസ്ലിം ജനസംഖ്യ 8873472 26.56%  

ക്രിസ്ത്യൻ ജനസംഖ്യ 6141269 18.38% 

സിഖ് ജനസംഖ്യ 3814 

ബുദ്ധ ജനസംഖ്യ 4752

ജൈന ജനസംഖ്യ 4489

© Adv Sherry J Thomas 16.08.19

(തപാൽ മുഖേനയോ ഈമെയിൽ വഴിയോ അഭിപ്രായങ്ങൾ അറിയിക്കുക)

Kerala State Commission for Minorities
Aanjaneya, TC 9/1023(2), Sasthamangalam, Thiruvananthapuram
Pin-695010, Kerala, India
Phone: 0471-2315133, 2315122, 2317122, 2318122.

Fax: 04712319122
Email: kscminorities@gmail.com

issues...